بە پێی ڕاگەیەنراوەكەی ئەنجوومەنی باڵای دادوەریی عێراق كە ئەمڕۆ یەكشەمە بڵاوی كردەوە، دادگای تاوانەكانی زیقار، سزای زیندانیكردنی هەتاهەتایی بۆ بازرگانێكی ماددەی هۆشبەر بە تاوانی بازرگانیكردن و فرۆشتی ماددەی هۆشبەر دەركردووە و دەڵێت"ئەو كەسەی كە بە زیندانیكردنی هەتاهەتایی سزادراوە، پێشتر بە بە یەك كیلۆ و 765 گرام ماددەی هۆشبەر لە جۆری "ئەمفیتامین" دەستگیركرابوو".

ئەو ڕاگەیەنراوە لە كاتێكدایە، بەپێی ئاماری بەڕێوەبەرایەتیی بەرەنگاربوونەوەی ماددە هۆشبەرەكانی عێراق، لە ساڵی 2022، زیاتر لە 14 هەزار كەس بە تۆمەتی بەكارهێنان و قاچاخیكردن بە مادەی هۆشبەر، دەستگیركراون كە 500 كەسیان ژن و مێرمنداڵ بوون.

سزاكە بەپێی ماددەی 28 لە یاسای بەرەنگاربوونەوەی ماددە هۆشبەر و كارتێكارە عەقڵییەكان ژمارە (50) بۆ ساڵی 2017 دەركراوە، هاوكات لە ماددەی 28 لە یاسای بەرەنگاربوونەوەی ماددە هۆشبەر و كارتێكارە عەقڵییەكاندا ئاماژە بەوەكراوە هەر كەسێك لە عێراق، بازرگانی بە ماددەی هۆشبەرەوە بكات، ئەوا بە لەسێدارەدان یان زیندانیكردنی هەتاهەتایی سزا دەدرێت.