ڕێكخراوی مافی مرۆڤی هەنگاو لە ڕێگەی ڕاپۆتێكەوە ئاماژە بەو دەكات، سامان یاسین-ی تەمەن 27 ساڵ، هونەرمەندێكی بواری ڕاپەر و ئاوازدانەری خەڵكی شاری كرماشانە، لە نامەیەكدا كە لە زیندانەوە بۆ رایگشتی و پارێزەرەكانی بڵاوی كردۆتەوە جەخت لەوە دەكاتەوە، لەژێر ئەشكەنجەی جەستەیی و دەروونی و دەرمانیدا ناچاریان بە دانپێدانانی زۆرەملێ بووە كە ئەگەری گواستنەوەی بۆ بەندیخانە جیاوازەكان لە ئارادایە.

ئەو هونەرمەندە كوردە لە نامەكەیدا دەڵێت"داوا دەكەم خێرا و لە دەرفەتێكی گونجاودا پێش لە بەڕێوەچوونی دانیشتنی دادگا، ئەو پارێزەرەی هەڵمبژاردووە، بەڕێز ئەمیر ڕەئیسیان و گرووپەكەیان، بە شێوەیەكی یاسایی بچنە سەر دۆسیەكەم و ئەم داواكارییە بە نووسراو بۆ لایەنە پەیوەندیدارەكان بنێرن و بەر لەوەی دانیشتنی دادگا بەڕێوە بچێت، هەلومەرجێك بڕەخسێنن كە لەگەڵم كۆ ببنەوە و چاوپێكەوتنمان هەبێت".

دەشڵێت"پێویستە ڕێگە بدرێت پارێزەر و ڕۆژنامەنووسانی ناوخۆی ئێران و ڕۆژنامەنووسانی نێودەوڵەتی لەو دادگاییكردنەدا ئامادە بن و داواكاریی خۆیان بۆ ئامادەبوون لە زووترین كاتدا بە نووسراو بۆ دادوەر سەڵواتی و بەرپرسان و دادگا بنێرن".

سامان سەیدی ناسراو بە سامان یاسین، ڕاپەڕ و ئاوازدانەری خەڵكی شاری كرماشان و دانیشتووی شاری تاران، لە ڕۆژی یەكشەممە (2ی ئۆكتۆبەری 2023) بەهۆی پشتیوانی لە ناڕەزایەتی و خۆپیشاندانە جەماوەرییەكان لە ماڵەكەی خۆیدا دەستبەسەر كرا.

دەقی نامەكەی سامان

نامەی كراوە

پارێزەران و جەماوەری هێژا، سڵاو

سامان یاسین (سیدی) لە بەندیخانەی ڕەجاییشار

بە لەبەرچاوگرتنی ئەو ١٠ مانگەی كە لە ماڵەكەی خۆم ڕفێندرام و لەژێر ئەشكەنجەی جەستەیی و دەروونی و دەرمانیدا ناچار بە دانپێدانانی زۆرەملێ بووم، هەروەها بەهۆی ناڕوونیی چارەنووسم و گواستنەوەم بۆ بەندیخانە جۆراوجۆرەكان و ڕێگەنەدان بە پارێزەری تایبەت و هەڵبژێردراوی خۆم كە بێتە سەر دۆسیەكەم، ئەم دەقە دەنێرم و بڵاو دەكەمەوە. چونكە ئەگەری ئەوەی كە دیسان جارێكی تر بۆ شوێنێكی نادیار بگواسترێمەوە، هەموو ساتێك لە مێشكمدایە.

"كاتی بەڕێوەچوونی دادگاییكردن لە ١٨ خەرمانان ڕاگەیەندراوە".

داوا دەكەم خێرا و لە دەرفەتێكی گونجاودا پێش لە بەڕێوەچوونی دانیشتنی دادگا، ئەو پارێزەرەی هەڵمبژاردووە، بەڕێز ئەمیر ڕەئیسیان و گرووپەكەیان، بە شێوەیەكی یاسایی بچنە سەر دۆسیەكە و ئەم داواكارییە بە نووسراو بۆ لایەنە پەیوەندیدارەكان بنێرن و بەر لەوەی دانیشتنی دادگا بەڕێوە بچێت، هەلومەرجی بڕەخسێنن كە لەگەڵم كۆ ببنەوە و چاوپێكەوتنمان هەبێت.

داواكاری دواتر:
دادگا كراوە بێت و پارێزەران و ڕۆژنامەنووسانی بەڕێزی ناوخۆی ئێران و هەروەها ڕۆژنامەنووسانی نێودەوڵەتی ڕێگەیان پێ بدرێت كە لەو دادگاییكردنەدا ئامادە بن و داواكاریی خۆیان بۆ ئامادەبوون لە زووترین كاتدا بە نووسراو بۆ قازی سەڵوەتی و بەرپرسان و دیوان و... بنێرن.

جەخت لەسەر ئەوە دەكەمەوە كە دادگا دەبێت كراوە بێت و بە ئامادەبوونی پارێزەرانی بەڕێز و پارێزەرانی نێونەتەوەییی مافەكانی مرۆڤ و ڕۆژنامەنووسانی ئێرانی و نێونەتەوەیی بەڕێوە بچێت.

لە كۆتاییدا:
داوا لە باوكی توماج ساڵحی دەكەم لە دادگاییكردنەكەم ئامادە بێت، چونكە بەڕێزیشیان كوڕەكەیان هاوهونەری بەڕێز و خۆشەویستی منە و بەهۆی گۆرانی و ڕاپەوە لە بەندیخانەدایە.

شەمە، ٧ی گەلاوێژی ٢٧٢٣
بەندیخانەی ڕەجاییشار
سامان یاسین (سەیدی)