نێچیرڤان بارزانی، سەرۆكی هەرێمی ‏كوردستان ئەمڕۆ دووشەممە 7ی ئابی 2023 لە میانی كۆبونەوەی لەگەڵ (ڤۆلكەر تورك) كۆمیسیاری باڵای نەتەوە ‏یەكگرتووەكان بۆ مافەكانی مرۆڤ جەختی لە پابەندیی هەرێمی كوردستانی بە پاراستن و بەرەوپێشبردنی دیموكراسی و مافەكانی مرۆڤ و ئازادییەكان و ئازادیی رادەربڕین و یەكسانی و دادپەر‌وەری كردۆتەوە.

بە پێی ڕاگەیانراوێكی سەرۆكایەتیی هەرێمی كوردستان كە تێیدا هاتووە، ئامانجی سەردانەكەیان‌ كە یەكەم جارە دێنە عێراق و هەرێمی كوردستان، دۆخی مافی مرۆڤ و ئازادییەكان، زەمینەی كار و چالاكیی رێكخراوەكانی كۆمەڵگەی مەدەنی و ئازادیی راگەیاندن و رادەبڕین و كاری رۆژنامەڤانی لە عێراق و هەرێمی كوردستان و دەر‌فەت و كێشەكانی تاوتوێ كران.
ڕاگەیەنراوەكە دەڵێت، نێچیرڤان بارزانی وێڕای ئەوەی سەردانەكەی بە گرنگ لە قەڵەم داوە، هاوكات پابەندیی هەرێمی كوردستانی بە پاراستن و بەرەوپێشبردنی دیموكراسی و مافەكانی مرۆڤ و ئازادییەكان و ئازادیی رادەربڕین و یەكسانی و دادپەر‌وەری دووپاتكردەوە.
 
ڕاگەیەنراوەكە دەڵێت"سەرۆكی هەرێمی ‏كوردستان داوای كرد دامەزراوەكانی نەتەوە یەكگرتووەكانی تایبەت بەو بوارانە، وەك هاوبەشێك هاوكاری و یارمەتی پێشكێش بە لایەنە پەیوەندیدارەكانی عێراق و هەرێمی كوردستان بكەن، بەتایبەتی كە عێراق و هەرێمی كوردستان لە قۆناخی راگوزەردان و پێویستییان بە یارمەتی و پشتگیری هەیە بۆ برەودان بەو بوارانە".