ئاسۆ عەبدوللەتیف
ئۆپۆزسیۆن لەدەستی نەوەی نوێدایە بە واقیعی حاڵ، باسی خەیاڵ و تیۆرو چەمک ناکەم باسی فاکت و تەکنیکی ڕاکێشانی سۆزی شەقام دەکەم، ئێستا ئەوەی دژی حکومەتی هەرێم دەجوڵێتەوەو ڕەخنەدەگرێت و ناڕازییە لەو دۆخەو بەغدادی پێ باشترە لە هەولێرو سلێمانی، بەکردەنی ڕەخنەو چالاکیەکانی دەچێتە خزمەتی خەبات و ئەجێندای نەوەی نوێ بە ئیسلامیەکانیشەوە، وەک هەمان دۆخی پەراوێزخستنی حیزبە چەپ و ڕادیکاڵ و سیکۆلارو نەتەوەییەکانی سەردەمی هاتنەوەی ئیمام و شۆڕشی ئیسلامی ساڵی ١٩٧٩ی ئێران و ڕووخانی محه‌مه‌د ڕه‌زا شا.
بۆیە باشترە گوتاری ئۆپۆزسیۆن هاوسەنگ بێتەوەو بەرەی پۆپۆلیست و دژە نەتەوە بەتەواوی جیابکرێتەوە لەبەرەی عاقڵمەندان و خاوەن مافەکان و توێژە ڕاستەقینەکانی ئۆپۆزسیۆنی نیشتیمانی جددی نەتەوەخواز، چونکە مۆدێلی شوێنکەوتەیی گێلانە کۆتایی هاتووە بۆ مۆدێلێک لە زرنگی داهێنەرانە و گۆڕانکاری بنەڕەتی و ڕادیکاڵانە، هەموو گۆڕانکارییەکیش ئومێدی چاکسازی لەگەڵ نییە.
هەموو شۆڕش و کۆدێتایەک بەرهەمێکی شەرافەتمەندانەو شکۆدارانەی نیە؟
قەیس سوعەید، لە تونس لەساڵی ٢٠١٩ کاتێک کۆدێتای بەسەر شەرعیەت و پەڕلەمان و دیموکراسیەتدا کرد دژی ڕابەری هەڵبژێردراوی گەل ڕاشد غەننوشی و دوری خستەوە، سواری شەپۆلی ناڕازی شۆڕشی ٢٠١١ی تونس بوو، شۆڕشی محمد بوعەزیزییەکان و مەزڵومەکان و برسیەکانی دزی، دەی هەبوون لێرەوە شاگەشکە بوون چەپڵەیان لێئەدا بۆ ئەو مۆدێلە ترسناکە قەمعی و فاشیستی و پیلانگێڕییە دژی دیموکراسی، قەیس سوعەید پاڵەوان نەبوو وەک گاندی و ماندێلا، شۆڕشگێڕیش نەبوو، خانەنشینێکی زانکۆیی تێرو ئەرستۆکراتێکی لوتبەرز بوو، دیکتاتۆر بوو، دژی دیموکراسی و دەستورو یاساکانی هەڵبژاردن و عەدل و ئینسافی شۆڕشگێڕانەش بوو، ناسیۆنالیستێک بوو بەجارێک وڵاتی توشی قەیرانی سەخت و برسێتی کردەوە، کەچی هەبوون دڵخۆش بوون بەو گۆڕانکارییە هەر لەبەر ئەوەی ڕقی لە ئاین و خەتی ئیخوان موسلیمین و پێشەوا بەننا و هێڵی ستراتیجی ئیسلامی بوو، بۆیە ڕقبوون لە نیشتیمان و نەتەوەو حکومەت هیچ ئیزافەو چارەیەکت بۆ ناکات.
ناڕەزایەتی و چەپڵەو مۆری گۆڕانکاری خۆت هەرزانفرۆش مەکە هێشتا ئاسۆیەکی ڕوون دیار نییەو نیشتیمان هی هەموانەو دەبێت چاکسازی جەوهەری بکرێ و دەشکرێ، نیشانەی ڕەزامەندی و شایەتیدانت قورسەو مەدە لە بەرۆکی کاراکتەری بکەرنادیارو دیگا تەڵخ، بزانە واژۆو مۆرەکەت ئەخەیتە سەر چ کاغەزێکی سپی پاک.