هێمن عەبدوڵا
خاڵێك دابنێ ڕاستەوخۆ بە مەسج بۆت یەت
ئەگەر دەتەوێ باشتر بزانیت سەرنج لەم پێنج خاڵە بدە:
ئەمە بەروبومی سۆشیال میدیایی كوردییە، كە تاكی كورد خۆی پێوە سەرقاڵ كردوەو میدیاكارانیش خوێنەر یاخود وەرگر وەك كەرەستەیەك دەبینن، هەر چۆن بیانەوێت بینەر ئاراستە دەكەن، وەلێ میدیای كوردی لە گێژاوێكدایە هەرچی دەستكەوێت دەیكات بە باس و خواس تەنها لەبەر ئەوەی بینەری بۆ زیاد بێت.
(جف بردیمور) لە كتێبی (ئەلف و بێی كاركردن لە كەناڵەكانی ڕاگەیاندن) دەڵێت: ڕۆژنامەكان بۆ ئەوەی زۆرترین خوێنەر لە خۆیان كۆ بكەنەوە ناچار گرنگی بە هەندێ هەواڵی ساختەو ناڕاست دەدەن كە دورن لە كاری ڕۆژنامەگەری و میدییایەوە)، هەڵبەت ئامانج لە كۆكردنەوەی خوێنەر پێدانی زانیاری نییە، بگرە هەر سایتێك و پەیجێك و میدیایەك خوێنەر و سەردانیكەری زۆر بوو دەتوانێت باشتر ڕاوی كۆمپانیا بازرگانەكان بكات و ڕیكلامە بازرگانیەكان بهێنێتەوە و ئەو دەزگایە لە خۆی كۆبكاتەوە، بینەریش لەو نێوەندەدا تەنها وەك كاڵایەك دەمێنێتەوە كە دەگەڕیتەوە بۆ ناهوشیاری تاك بەرامبەر سۆشیال مییدیا.
لە هیچ شوێنێكی دنیادا نەبووە كەسێك ئازیزێكی لێ مردبێت و تۆ لە نێو پرسەكەیدا بیهێنیتە دەرەوە پێی بلێت (هەستت چۆنە؟، قسەتان چییە بۆ ئەو مردنە؟)، بەداخەوە لە ئێسێتادا هەركەسێك هەڵدەستێت دوور لە ئاكارو ئیتیكی كاری ڕۆژنامەوانی مایكێك دەگریت بە دەستیەوە و بەبێ هیچ بەهایەكی ئیتیكی كارەكەی و ئیتیكی مرۆڤبوونی قسە فڕێ دەدات.
لە دنیادا نەبوە هیچ كەسێك بە نهێنی نەخۆش بزانێت، بەڵام لێرە زۆرینەی زۆری ئەو كەسانەی لە بوارە گرنگەكانی ئەم كۆمەڵگەیەدا كار دەكەن، بەبێ پارێزگاری لە پیرۆزی پیشەكەیان هەرچی نهێنی خەڵكانێكە ئاشكرای دەكەن و دەست دەكەن بە گێڕانەوەی ئەو چیرۆكانەی كە ڕۆژانە پەیوەندیان پێوە دەكرێ، ئەمانە گەر لە وڵاتێكی یاسا سەروەریدابن دەبێت داواكری گشتی سكاڵایان لەسەر تۆمار بكات.
لە كۆتاییدا دەڵێم، بەداخەوە هەر وەك كورد دەڵێت (كە مامان زۆر بوو سەری مناڵ گیر ئەخوات)، جا هیوادارم مامانەكان كەم بن تاوەكو منداڵەكان بە جوانی بێنە دنیاوە.